عمرك حسيت بالوحدة؟

سؤال مباشر ليك : انت وحيد؟

اصل الوحدة مش بس انك تكون قاعد لوحدك فى مكان او ان يكون ملكش اصحاب.
فى وحدة اصعب من دى بكتير اوى انك مثلا تكون قاعد وسط اصحابك وكل الناس اللى بيحبوك وبرضه حاسس باالوحدة..
لما تسجن مشاكلك جواك لانك مش لاقى حد يفهمك..
لما تعد تتكلم كلام من قلبك ومتلاقيش حد مهتم بكلامك..
لما تكون متعود تتكلم مع حد وبترتاح معاه وفجأة يفارقك لاى سبب وبعديها متلاقيش حد يفهمك ويحس بيك زيه..
لما تكون نفسك تصرخ باللى جواك لكن يطلع كلامك وصرخاتك على شكل دموع فى عنيك لان مافيش حد بيسمعك..
ياترى بقى انت وحيد؟
طيب ياترى بتخاف ان ييجى عليك يوم تبقى فيه وحيد؟
يعنى عمرك فكرت قبل كده ان ممكن فى يوم من الايام اصحابك وكل اللى حواليك يبعدوا عنك وتبقى وحيد؟
بتخاف مثلا من الموت انه ياخد منك اعز الناس عليك؟
خايف من القدر او من الدنيا انها تبعد عنك اصحابك؟
ياترى بعد ده كله انت وحيد او خايف تبقى وحيد؟

اكيد
معظمنا بيحس بالوحدة او على الاقل بيخاف من الوحدة، انا عن نفسى كتير بحس
انى وحيدة وسط اصحابى لانى مش دايما بعرف اوصلهم احساسى اللى جوايا، دا
غير ان احيانا الظروف بتبعد عنى الناس اللى بتفهمنى بجد وبتحس بيا حقيقى.

احلى كلام بقى ممكن يتقال فى الموضوع ده
ان الانسان المسيحى المفروض ان عمره ما يحس بالوحدة، وانت ليه اصلا ييجى فى دماغك التفكير ده؟

ايه مش لاقى حد يسمعك؟ ربنا مستعد يسمعك من هنا لبكره ده ربنا بيسكت الملايكة عشان يسمع صوتك وبيفرح جدا بيك ساعتها.
ايه مش
لاقى حد يفهمك؟ وهتلاقى فين حد يفهمك مهما كان مخه وتفكيره ومشاعره قد
ربنا؟ ربنا اللى عارف ادق ادق حاجة عنك معقولة هتلاقى حد يفهمك زيه؟
مش لاقى حد يحس بيك؟ ربنا اكتر واحد ممكن يحس بيك فى الدنيا كلها دا هو اللى قال "من يمسكم يمس حدقة عينى" فى اكتر من كده؟

المفروض
انك عمرك ما تحس بالوحدة لان ربنا معاك دايما حتى لو اعز انسان عليك فارقك
لاى سبب او لو ملكش اصحاب ربنا هو صاحبك والمفروض ان هو له الاولوية عن
اصحابك
والمفروض
كمان انك متخافش من اللى جاى، خايف تبقى وحيد؟ طيب ما احنا قولنا ان ربنا
معاك ومش هيسيبك خايف ليه بقى؟ دايما قول لربنا"ليس كما اريد انا بل كما
تريد انت" سيب ارادة ربنا هى اللى تمشيك فى مستقبلك وزى ماربنا هيختارلك
تكون وحيد او مش وحيد اعرف ان ده الاحسن ليك.
وصدقونى
مافيش حد ممكن يريحك قد ربنا، كل اللى عليك انك تكلمه وهتلقاه سمعك وحاسس
بيك وبضعفك وهتلاقيه احسن ميت مرة من اى حد فاكره ممكن يريحك.

اللى نطلع منه من الموضوع الطويل ده ان عمر ما حد فينا يقول:-
(انا وحيد)